O tráfico na AP-9 redúcese un 82% en abril, ata os 4.385 vehículos

/in , /by

05.05.2020. 

O tráfico total da Autoestrada do Atlántico acadou en abril o seu mínimo histórico cunha redución dun 81,7% en comparación co mesmo mes do ano pasado, pasando dos 23.968 vehículos diarios de entón aos 4.385. A intensidade media diaria (IMD) da AP-9 presenta unha cifra moi inferior á habitual desde que se iniciou o estado de alarma decretado o pasado 14 de marzo, cunha diminución de 20.020 coches ao día en comparación co conxunto de 2019, un 82,03% menos.

A autoestrada galega acadou o seu mínimo histórico de tráfico despois de que no mes de marzo a IMD diminuíse ata os 12.727 vehículos, un 42,48% en comparación con marzo de 2019.

Colaboración cos bombeiros municipais

Autopistas del Atlántico SA (Audasa) colabora coas unidades de bombeiros nos municipios de Cambre, Culleredo, Padrón, Rois e Dodro, entre outros, nas labores de desinfección municipal das rúas principais, co desprazamento á zona dos equipos móbiles da compañía galega para esparexer 12.000 litros de hipoclorito sódico. Os camións de Audasa, que teñen unha capacidade de 10.000 litros cada un e tamén traballan na desinfección da totalidade da AP-9, proseguirán con esta colaboración cos municipios nas vindeiras semanas en distintos municipios de Galicia.

Os equipos móbiles veñen de desinfectar tamén a totalidade da autoestrada AP-9, incluíndo as súas seis áreas de servizo, as tres áreas de descanso e todas as zonas de peaxe. Estas tarefas manteranse diariamente para garantir o reforzo da seguridade da vía, os traballadores da concesionaria e os usuarios. As seis áreas de servicio da AP-9 permanecen abertas no seu horario habitual para que os vehículos poidan repostar. As áreas de Repsol serven gratuítamente un almorzo aos transportistas nun espazo habilitado para a restauración.

Audasa, que non levou a cabo medidas de regulación temporal de emprego nin solicitou ningún tipo de compensación gubernamental, reafirma o seu compromiso coa máxima seguridade da Autoestrada do Atlántico e dos seus traballadores, conservando nos postos físicos o seu persoal de mantemento dedicado preferentemente a labores de atención á vialidade invernal, centro de control e seguridade de túneis, ademais dos equipos de obras para reparacións e emerxencias esenciais e os servizos de atención aos clientes e de asistencia ao pago nas peaxes nos casos necesarios. A tarxeta bancaria e contactless e o sistema de telepeaxe continúan a ser os sistemas preferentes de pago nas peaxes.

Audasa, un 19% máis de tráfico que a media española en 2019

/in , /by

29.04.2020

Autopistas del Atlántico SA (Audasa) vén de incrementar no 2019 nun 3,9% o seu beneficio, mellorando o seu tráfico en case un 19% por riba da media das 25 autoestradas do Estado. A compañía con sede en Galicia presenta hoxe as súas contas á CNMV con 153,4 millóns de euros en ingresos por peaxe (+6,4% respecto a 2018) e un beneficio de 42,3 millóns de euros (+3,9%). A AP-9 rexistra unha intensidade media diaria (IMD) total de 24.405 vehículos, un 1,5% superior á de 2018 e un 18,7% maior que a media de todas as autoestradas estatais.

A compañía conseguiu estes números despois de ter que incrementar as peaxes nun 3,51% en 2019, ao asumir Autopistas del Atlántico o 100% das inversións de ampliación en Santiago e a Ponte de Rande e os traxectos de volta gratuítos dos tramos entre Vigo e Pontevedra para vehículos lixeiros con telepeaxe.

A peaxe media real da AP-9 sitúase en 9 céntimos/km, xa que Audasa dedicou en 2019 un total de 10,8 millóns de euros a descontos e bonificacións aos seus clientes, un 11% máis que en 2018. A compañía aplica un 25% de desconto en todos os traxectos e a todos os vehículos lixeiros con telepeaxe que realicen traxectos de ida e volta no mesmo día laborable ou sábado; e un 75% adicional nos traxectos do tramo Vigo-Pontevedra (na viaxe de volta realizada por vehículos lixeiros no mesmo día laborable ou sábado e abonado con telepeaxe, que co 25% xeral queda bonificado nun 100%).

Audasa mellorou en 2019 os sistemas de cobro automático, que xa acadan o 85,6% de todos os seus tránsitos. A compañía vén de investir 5,9 millóns de euros en mellorar a infraestrutura e o seu entorno e 1,2 millóns en gastos medioambientais. En 2019 o cadro medio de empregados de Audasa medrou nun 6,7%, con 223 profesionais dos que un 40% son mulleres.

Plan coronavirus 2020

A compañía galega ten previsto adicar a meirande parte dos beneficios que xere en 2020 a preservar a súa liquidez, diante da drástica caída dos seus ingresos a partir do 14 de marzo. A IMD total da AP-9 reduciuse un 81% entre o 1 e o 19 de abril de 2020 con respecto ás mesmas datas de 2019. A compañía vén de adoptar un completo plan de medidas para afrontar o impacto da crise do coronavirus, dado que a sociedade foi declarada servizo esencial que debe manter todas as súas prestacións e garantías de saúde.

Desde que a Empresa Nacional de Autopistas (ENA) foi privatizada en 2003, o grupo Itínere xestiona o servizo sen ter repartido dividendo aos seus accionistas e dedicando o beneficio de Audasa durante 17 annos a reducir o seu endebedamento como consecuencia do pago de 1.622 millóns de euros ao Estado ese ano pola adquisición de ENA. En 2020 Audasa prevé utilizar a meirande parte dos beneficios que xere para preservar a súa liquidez diante do impacto da crise do coronavirus.

O paquete de medidas aprobado por Audasa inclúe un compromiso polo emprego (223 profesionais de plantilla media en 2019), control de liquidez e redución de gastos operativos. O paquete inclúe un plan de apoio social que, entre outras iniciativas, aborda o reparto de pantallas faciais en centros galegos de saúde ou a prestación gratuíta de servizos de desinfección en varios municipios galegos. A compañía non ten vencementos de débeda entre abril e decembro de 2020, pero aínda non está en disposición de calcular o impacto do descenso dos seus ingresos en 2020.

Autopistas del Atlántico – Presentación de resultados 2019 e medidas coronavirus 2020

Audasa retoma o reforzo da seguridade vial en Rande e a PO-10

/in , /by

27.04.2020 (actualización)

O Ministerio de Transportes, Mobilidade e Axenda Urbana vén de autorizar a Autopistas del Atlántico S.A. (Audasa) á execución de dúas obras de mantemento na AP-9. Trátase da reparación das xuntas do viaduto da PO-10 sobre a autoestrada galega, á altura de Pontevedra, e da substitución da argamasa das xuntas da Ponte de Rande. O obxectivo é evitar posibles problemas na seguridade vial e mellorar a comodidade na condución dos usuarios.

A redución do tráfico, cun descenso superior ao 70% na intensidade media diaria (IMD) nas últimas semanas, supón unha oportunidade para materializar unha mellora duradeira cunha mínima afectación para os viaxeiros.

Os traballos na Ponte de Rande, que estaban previstos para comezar o 27 de abril, trasládanse á vindeira semana por causa das condicións metereolóxicas e prolongaranse inicialmente ata o xoves 30 de abril ás 13.00. Sempre estarán disponíbeis 2 carrís por sentido.  Se por cuestión metereolóxicas non se puideran concluir reiniciaranse o luns 4 de maio ás 9.00 horas ata o venres 8 de maio ás 13.00 horas. No viaduto da PO-10 sobre a AP-9, que une o nó do Pino coa rotonda de Marín, os traballos levaranse a cabo dende as 9.00 horas do 28 de abril se o permite a meteoroloxía ata as 19.00 horas do 29 de abril. Estas obras poderán supoñer algún corte de carril de xeito alternativo en ambos sentidos, ademais de pechar momentaneamente a saída cara Santiago, coa alternativa para os vehículos de realizar un cambio de sentido na rotonda de Marín.

A concesionaria galega comezará tamén nos próximos días o reforzo do firme en puntos concretos da autoestrada e da estabilización de cembas relacionadas coa seguridade vial. Tamén se solicitou autorización para iniciar a campaña de vexetación para a mellora da visibilidade da sinalización, así como para prevención de lumes e a realización de traballos de mantemento no valado que evita o acceso ás propiedades contiguas.

AESA autoriza o balizamento dos catro tirantes exteriores de Rande

/in , /by

22.04.2020. 

A Axencia Estatal de Seguridade Aérea (AESA), dependente do Ministerio de Transporte, Mobilidade e Axenda Urbana, vén de autorizar o balizamento dos catro tirantes exteriores da Ponte de Rande, en Vigo, tras a ampliación do mesmo. A estrutura está dentro das servidumes aeronáuticas do Aeroporto de Peinador e supera os 100 metros de altura, polo que é necesario proceder ao seu balizamento.

A autorización estaba condicionada á instalación de luces de obstáculo cun sistema dual media A/media C, de modo que permitise aos pilotos das aeronaves visibilizar a ponte en condicións de baixa visibilidade.

A iluminación diurna consta de luces de obstáculo de media intensidade de tipo A no eixo central dos dous pórticos da ponte, que emiten luz branca de descintileos, dispostas en dous niveis: unha luz de obstáculo situada na parte máis alta e outra luz de obstáculo nun nivel intermedio.

A iluminación nocturna consta de luces de obstáculo de media intensidade de tipo C, que emiten luz vermella omnidireccional, ubicadas na parte máis alta dos dous pórticos e en tres niveis intermedios. Adicionalmente, de noite ilumínanse os tirantes exteriores con proxectores de luz dispostos sobre o taboleiro da ponte. Esta iluminación debe poñerse en funcionamento ao tempo que as luces de obstáculo de media intensidade de tipo C dos pórticos.

Dado que a instalación non podería ser visible en todos os ángulos de azimut, como consecuencia do apantallamento lateral dos propios tirantes da ponte, todas as luces de obstáculo ubícanse sobre o eixo central do lado exterior dos pórticos.

Asimesmo, o balizamento da Ponte de Rande condicionouse a que a secuencia de palpebrexo de todas as luces de obstáculo debía estar sincronizada.

A concesionaria da ponte solicitou a AESA a autorización do balizamento da ampliación da Ponte de Rande, en base ao cumprimento do art. 5.1.12 do Decreto 584/1972, de 24 de febreiro, de servidumes aeronáuticas, modificado polo Real Decreto 297/2013, de 26 de abril. A axencia vén de autorizar este proceso tras realizar unha inspección in situ e analizar a documentación presentada.

Audasa colabora co Concello de Padrón na desinfección das súas rúas

/in /by

22.04.2020. 

Autopistas del Atlántico SA (Audasa), en colaboración co Concello de Padrón, levará a cabo no serán de hoxe labores de desinfección nas rúas deste municipio coruñés, ademáis das de Rois e Dobro, integrados na comarca das Terras de Iría. A concesionaria galega da AP-9 desprazará á zona unha brigada de dúas unidades móbiles da compañía, formada por un camión cisterna e un vehículo de apoio, para esparexer 12.000 litros de hipoclorito sódico.

O percorrido, que foi fixado por Protección Civil, comezará en Padrón e transcurrirá seguindo o que habitualmente fan os camións do lixo, incluíndo a rúas Rosalía de Castro, Castelao, Real e tamén na zona do Souto e na praza de abastos. Posteriormente desenvolverase nos municipios de Rois e Dobro.

Os equipos de Audasa (9 camións cunha capacidade de 10.000 litros cada un), que tamén traballan na desinfección da totalidade da AP-9, proseguirán con esta colaboración nas vindeiras semanas en distintos municipios de Galicia. Esta semana fixerono xa en Cambre e Culleredo.

Estas labores de desinfección xorden do ofrecemento da concesionaria galega ao Ministerio de Transportes, Movilidad y Agenda Urbana e á Delegación do Goberno en Galicia para axudar na loita contra a propagación do coronavirus. Audasa continuará con estes traballos en diferentes localidades galegas de xeito periódico e sempre baixo a coordinación das autoridades.

Audasa fabrica pantallas de protección con tecnoloxía propia para o seu persoal

/in , /by

18.04.2020. 

Autopistas del Atlántico SA (Audasa) vén de producir un total de 150 pantallas faciais para os postos de cara ao público do seu persoal, principalmente peaxistas e técnicos de mantemento, que son o colectivo de maior risco de contaxios de coronavirus. As pantallas foron fabricadas coa tecnoloxía propia da compañía galega, a través de impresoras 3D xeralmente utilizadas para a fabricación de pezas de reparación de instalacións e maquinaria, e cunha capacidade de produción de 240 unidades de pantallas ao mes. Para garantir a máxima seguridade, todas as pantallas faciais dos centros de traballo son desinfectadas antes e despois de cada novo turno.

A compañía, que tamén repartiu a semana pasada un lote de pantallas faciais nos centros de saúde de Sárdoma e Rosalía de Castro, en Vigo, vén de ampliar a produción para abastecer deste material de protección nas vindeiras semanas a institucións e centros sanitarios de Galicia.

Máscaras e guantes para todo o persoal

Dende o 15 de abril, todo o persoal de Audasa e Autoestradas de Galicia dispón de novos elementos de protección coa chegada de 3.000 máscaras FFP2 e 4.000 guantes de látex.

Audasa reafirma o seu compromiso co coidado dos seus traballadores ao tempo que traballa polo mantemento da actividade para ofrecer un servizo de máxima calidade e seguridade durante a crise sanitaria da Covid-19, co persoal de mantemento adicado preferentemente a labores de atención á vialidade invernal, centro de control e seguridade de túneis  e o establecemento da tarxeta bancaria e contactless e o telepeaxe como sistemas preferentes de pago nas peaxes, con persoal de apoio para cando sexa necesario.

Todas as gasolineiras da AP-9 continúan abertas

/in , /by

16.04.2020.

Todas as gasolineiras situadas na AP-9 permanecen abertas no seu horario habitual (dende as 7.00 horas ata as 23.00 horas) para todos aqueles usuarios que precisen combustíbel. As seis áreas de servizo entre Ferrol e Tui da Autoestrada do Atlántico están situadas nos seguintes puntos: O Burgo, no punto quilométrico 6; Miño, no 15F; Ameixeira, no 39; Compostela, no 81; O Salnés, no 114;  e en San Simón, no punto quilométrico 144.

En cada unha das áreas de servizo pódense adquirir produtos de primeira necesidade e as gasolineiras de Repsol serven de xeito gratuíto un almorzo aos transportistas profesionais. Tamén permanecen abertas as tres áreas de descanso da AP-9 (Piadela, no punto quilométrico 18; Marantes, no punto quilométrico 60; e Bértola, no 135).

Os equipos móbiles de Autopistas del Atlántico S.A. (Audasa) desinfectan regularmente todas estas áreas e todas as zonas de peaxe como medida de reforzo para garantir a seguridade na autoestrada galega, os seus usuarios e os traballadores da concesionaria durante a crise do coronavirus.

O tráfico na AP-9 diminúe un 42% en marzo tras as medidas do Goberno

/in , /by

6.04.2020.

O tráfico conxunto de todos os tramos da Autoestrada do Atlántico reduciuse un 42,48% en marzo en comparación co mesmo mes do ano pasado, pasando dos 22.125 vehículos diarios a 12.727, como consecuencia do decreto de estado de alarma pola crise do coronavirus do 14 de marzo.

A diminución da intensidade media diaria (IMD) é un 42,08% inferior á de febreiro, cando se rexistraron 21.974 vehículos ao día, e un 39,07% menor que a de xaneiro, con 20.888 vehículos.

En comparación co conxunto de 2019, a IMD de marzo supón unha caída dun 47,85% do número de vehículos diarios que transitan pola AP-9.

Mantemento da calidade do servizo na autoestrada

O persoal de mantemento da Autoestrada do Atlántico traballa desde o 27 de marzo de maneira preferente en labores de atención á vialidade invernal, centro de control e seguridade de túneis, en cumprimento da medida gubernamental para extremar ao máximo a prevención de posibles contaxios.

A pesares da forte caída da actividade, a empresa concesionaria (Autopistas del Atlántico SA) mantén operativa a estrutura necesaria para manter o servizo en condicións de seguridade e calidade, así como as medidas para velar polo coidado e a seguridade dos seus traballadores, e a día de hoxe non pediu ningún tipo de compensación ao Estado polas restricións de tráfico nin solicitou expedientes de regulación temporal de emprego.

Para seguir garantindo a actividade, os profesionais de Audasa que teñen a posibilidade de facelo operan en teletraballo e mantéñense as brigadas de obras para reparacións e emerxencias esenciais, ademais dos servizos de atención aos clientes nas áreas de peaxes e servizos centrais.

Os métodos preferentes de pago nas peaxes da AP-9 continúan a ser a tarxeta bancaria e contactless e o sistema de telepeaxe, co mantemento de persoal de apoio aos condutores por se fose necesario, e seguen activos os equipos que velan pola seguridade dos usuarios.

Que debo facer se teño que desprazarme en coche?

/in , /by

30.03.2020.

O estado de alarma decretado polo goberno de España ante a crise do coronavirus limita a libre circulación de todos os cidadáns e, polo tanto, tamén os desprazamentos en coche. As únicas situacións permitidas para saír da casa son basicamente para ir e voltar do traballo, acudir ao hospital ou centro sanitario, mercar alimentos, medicamentos, produtos farmacéuticos e de primeira necesidade, ou dar asistencia ou coidado a maiores, menores, persoas dependentes, persoas con discapacidade ou especialmente vulnerábeis. Tamén para cargar combustíbel en gasolineiras ou estacións de servizo.

É recomendábel viaxar só. O goberno vén de posibilitar que viaxe máis dunha persoa en cada vehículo, pero como máximo unha por fila de asentos. As únicas excepcións son para acompañar a menores, persoas con discapacidade, maiores ou se existe unha causa xustificada. Incumprir esta norma de confinamento ditada polas autoridades poderá supor unha sanción económica.

Como só se pode viaxar por un motivo de forza maior, é necesario levar consigo algún documento que o verifique: un certificado da empresa se é por motivos laborais ou o recibo da compra se foi para mercar alimentos ou outros produtos.

Non é obrigatorio o uso de mascarillas ou guantes, pero sí lavar as mans con frecuencia. Isto é especialmente necesario antes e despois de utilizar o coche. Tamén é recomendábel desinfectar elementos como o volante, o cadro de mandos, o cambio de marchas, a radio, etc. Segundo a Organización de Consumidores e Usuarios (OCU) débese empregar unha solución que conteña como mínimo un 70% de alcohol. Tamén é suficiente con auga e xabón. É importante unha boa ventilación do vehículo. Como nos lembra o Servizo Galego de Saúde (Sergas), hai que tusir ou espirrar sobre un pano de papel e tiralo inmediatamente; se non tes un pano, tuse ou espirra sobre o brazo para evitar o contacto coa man.

Información para transportistas diante da crise do Covid-19

/in /by

30.03.2020.

As autoridades gubernamentais están a adoptar unha serie de medidas fronte a expansión do coronavirus que afectan directamente á mobilidade das persoas. Pero o transporte de mercadorías por estrada non está sometido ás restricións de carácter xeral. Autopistas del Atlántico, empresa concesionaria da AP-9, respecta e asume todas as decisións do Ministerio de Transportes, Mobilidade e Axenda Urbana. Así, na autoestrada galega as gasolineiras permanecen abertas as 24 horas para repostar e as áreas de servizo, no seu horario. Nestas últimas non se pode acceder ao interior, pero sí adquirir alimentos e bebidas ou outro tipo de produtos de primeira necesidade. Ademais, veñen de instalarse baños químicos no exterior de todas elas.

Durante o estado de alarma, a regulación aprobada polo goberno permite aos transportistas profesionais:

  • Conducir con dous ocupantes na cabina. Sempre coas necesarias medidas de seguridade.
  • Suspender os tempos de condución. Pódese conducir máis de 10 horas diarias, pero deben respectarse os descansos e pausas obrigatorias.
  • Circular con documentos caducados que non puideron ser renovados durante estes días.
  • Recoméndase contar cun certificado de desprazamento mentres se traballa.
  • Prorrógase a validez das autorizacións e certificados de transporte de animais.
  • As mudanzas poden continuar traballando, axustándose ás medidas de seguridade.
  • Os talleres continuarán abertos e suspéndense as xestións presenciais na DGT.

Para máis información, pode consultarse a guía sobre o coronavirus para o transporte e a loxística elaborada por UNO, agrupación de empresas relacionadas coa cadea de suministros (transporte, almacenamento, etc.).